popp er snilld

Popp er snilld og þetta er ein mesta snilld sem ég hef fundið á internetinu <3 Skil ekki sjálfa mig að hafa ekki googlað þetta fyrr.
Ekkert uppvask á potti! Ekkert ofsaltað popp secret!
Sjálfsaltað eða sykrað!
Jeij <3

Svo eru líka fullt af skemmtilegum hugmyndum um hvernig má bragðbæta poppið hér.

Helgarferð til Hamborgar

Ég og Stella vinkona mín fórum í helgarferð til Hamborgar á síðustu helgi. Það var ótrúlega hlýtt og fallegt veður allan tímann sem var æðislegt. Við versluðum slatta og ég sýni ykkur kannski nánar það sem ég keypti í öðru bloggi. Hér eru nokkrar myndir frá ferðinni :)

(þið verðið að afsaka iphone gæðin á sumum myndunum)

Útsýnið af hótelinu

Ótrúlega sætt franskt kaffihús

Á sunnudeginum voru allar búðir lokaðar og við fórum á hjólabát

avókadó uppskriftir

Datt fyrir tilviljun inná þennan fína link með gómsætum avókadóuppskriftum. Við systur skelltum í númer 1 en áttum ekki geitaost en notuðum kotasælu í staðin. Það var mjög ljúffengt. Ótrúlega margar aðferðir sem hægt er að nota við að borða avókadó. Mæli með að skoða listann.

Brauð-ið

Þessi frábæra uppskrift kemur héðan. Þetta er uppáhalds brauðuppskriftin mín þar sem hráefnin eru fá og einföld  og brauðið er rosa gott. Hef gert svona brauð úr henni en einnig bollur og snittubrauð svo ég myndi segja að það sé allt hægt! 

Í brauðið fer: 

500 g hveiti

0.75 msk ger

0,75 msk salt 

375 ml volgt vatn 

Ath. þetta er hálf uppskrift og úr henni kemur þetta brauð eins og er á myndunum, heil uppskrift er hér.

Aðferð:
Hrærið allt saman í stórri skál með sleif þar til deigið er orðið frekar blautt og klístrað og nánast allt hveitið horfið inn í deigið.
Leggið viskastykki eða plastfilmu yfir deigið og látið það lyfta sér við stofuhita í 2 tíma.
Mótið deigið með hveitistráðum höndum og leyfið því að lyfta sér í hálftíma í viðbót. 

Hitið ofninn í 220°C. Ég leyfði bökunarplötunni að hitna í ofninum líka.

Ég bakaði brauðið í um 30 mínútur og galdurinn við góða skorpu er að hafa eldfast mót með heitu vatni neðst í ofninum.

Ég skar svo svona kross í brauðið rétt áður en það fór í ofninn svo að það lyfti sér betur.

Yndislega ljúffengt. 

Svo má líka geyma degið í ísskáp í allt að tvær vikur og taka af og baka brauð þegar manni lystir!

SÆTINDI: Oreo kaka

Við vorum ekkert að grínast með þessa sætindaþörf sko! Stundum er metnaðurinn meiri og þá er skellt í svona alvöru köku sem þarfnast meiri fyrirhafnar eins og t.d. þessi eða ískökurnar sem hún Katla gerði um daginn.

Uppskriftin af oreokökunni er upprunalega héðan.

Það sem þarf:
1 1/2 bolli sykur
2 eggjarauður
125 g smjör
2 dl karamellujógúrt
1 1/2 tsk lyftiduft
1/2 tsk vanilludropar
1 tsk vanillusykur
3 bollar hveiti
u.þ.b. 12 muldar oreo kexkökur

Aðferð:
Hitið ofninn í 160°C. 
Byrjið á því að hræra vel saman eggjarauðum og sykri. 
Hrærið svo við smjörið, jógúrtina, lyftiduftið, vanilludropa og vanillusykur.
Hrærið hveitið svo saman við með sleif og svo er oreo kexinu bætt útí að lokum.
Bakið í miðjum ofni í um 30 mín eða þar til kakan er orðin gullinbrún. (Mér finnst gott að athuga hvort hún sé tilbúin með því að stinga prjóni í kökuna miðja og ef það kemur ekkert deig með honum er kakan tilbúin.)

Smjörkrem:
Þessi uppskrift er blanda af nokkrum uppskriftum sem hafa verið í uppáhaldi hjá okkur. Í hana fer:
150 g smjör
1/2 tsk vanilludropar
1 1/2 tsk vanillusykur
2 msk sýróp
2 msk kakó
1 1/2 - 2 msk kaffi
500 g flórsykur

Byrjið á að þeyta saman allt nema kaffið og flórsykurinn. Þeytið svo flórsykurinn við í litlum skömmtum og setjið kaffið þegar kremið virðist of þykkt.
Smyrjið svo kreminu á kökuna og myljið oreo kexi yfir.
Njótið með bestu lyst!

FERSKT

Namm namm :)